Jam 1 | WSK | STEP | Ani James, Kaem ko ura kari se Kari Biya Jesus Kristus ko ura kari tala. Ani den amilmil imi nina Israel kariimet motam 12 ninga ali beteman ale namaman sor sor bagasan mu ningarsam.

James 1

Den gira

1 Ani James, Kaem ko ura kari se Kari Biya Jesus Kristus ko ura kari tala. Ani den amilmil imi nina Israel kariimet motam 12 ninga ali beteman ale namaman sor sor bagasan mu ningarsam.

Ikup gia mu gemang sokel tuso

2 Aga singsang alo, ikup duap duap nengete aratuk mu am amilmilaralko. 3 Mu awuk, nina ikisan, ikup aratoso ale nengemang ningi nunguning ira arigiso, mu nengemang sokel tuso, se eng ikup saki te mu sokel agotala sanamasan. 4 Se nina ikup gi se te sokel ago la sanami se lagaralko. Mu te ninga nengemang ningi nunguning mu aurok se yawarakala bagaralko, ale ninga aolak bagara te munan ningo kasik la me ko tukunang aralko. ^{▼▼James 1:2-4 Ikup gia ale te sokel ago sanamara: Mat 5:12,48; Rom 5:3-5; 1 Peter 1:6-7; 4:13-14.}

Ikia ningo toko kuar mu Kaem isaruko

5 Ni awiriya ikia sinar yawara ko tukunang asam agi mu, Kaem isaru se ikia biyala kisokko. ^{▼▼James 1:5-6 Ikia sinar ningo tanakko sail taginakko: Pro 2:1-5. Nangamang ningi nunguning te isarnakko: Mark 11:24.} Mu nu gomang ikuwa se me kisokko. Nu ikia sinar ningo ni ko isesam mu la amilmil karogo kisokko. Nu munan butata nangimik te beteso. 6 Bare ni gemang me namuruk tairukko, ni gemang ningi nunguningkiri te isaru mu asele kisokko. Mu awuk, kari gomang namoso taiso mu nu gagi tamun daula itugu karogo namoso taiso wore turan. 7 Se kari uwuta mu baluk, “Kaem mel bo ani aisukko pa!” ma me balukko. Mu Kaem mel bo me tuokko. 8 Mu awuk, nu mel suen biya beteso mu noko ikia gomang suwanta te me beteso, mu noko ikia gomang nama tai se beteso.

Ni mel ago agi mena agi wore Kaem ko la amilmilerko

9 Ni awiriya kimik mel mena agi mu, Kaem ka saongam ale ka patowaram mu ko amilmilerko. 10 Se ni kimik mel suen biya karogo agi mu, Kaem ka kutuwu kerak kapa aliti ka beteram mu ko amilmilerko. Mu awuk, tam sisik ko bala yawara pagoso, ale aking tairatela mena namoso iwitata ni kuarko. 11 Worem basuso ale ko kowar tam atumuso, se ko sisik yawara mu kusuwoso ale piripirik ma kaposo iwitatala, kariimet nungumik mel karogo mu nunga ura umutang la ilumon namawa awete kuemonko. ^{▼▼James 1:9-11 Kari mel bolala awuram ko dugu duap: Luke 12:16-21.}

Ira ariga ko duap

12 Kariimet awiriya ira ariga ko ikup saki kote aratoso wore nu sail ago la sanamoso, mu am amilmilurukko. Mu awuk, nu ira ariga mu kia sapuruk mu, koma ningo marak yawara Kaem awiriya nu ko kueso mu tuokko ko balam umutang nu taukko. 13 Ikialko. Awiriya kilek memek bitirukko ikia moso, mu nu baluk ale “Imi Kaem aninga ira arigiso” ma me balukko. Mu awuk, kilek memek bo Kaem ko ikia tagirokko me terong. Se betelatala Kaem kari bo ira ariga me ikiso. Mena. 14 Mu kari kota ko ikia memek gomang ningi wore barasoso ale diruwuso se kilek memek ningi namoso. 15 Se ikia memek gomang ningi umutang nama lagoso mu ko nunguning eng nu kilek memek beteso. Se kilek memek umutang nama lagoso mu ko nunguning nu kuera ale sarenga namara ko lage te namoso.

16 Buta se aga singsang yawara, nengeta ninga ikia kawel te ninimi me kulalko, diram la ikialko. 17 Munan ningo suen la mu Ba Kaem duruk wonong te wore kote taiso. Nu nikinang duap, nu taiti biya ko nikinang suen la nungam se aniso. Bare noko munan mu tam agi, worem arigiso se ko tamarum maiso namoso, ale aking tukunang aso peleso, wore uwuta mena. Nu ko munan ngual me guruguso patawoso, noko munan mu am koma suwanta la eng aniso. 18 Se nu kota ko ikia gomang karo tuam ale ko den nunguning nangaram mu te ana noko kariimet ko nanga awuram. Ana mu kariimet motam biya nu udagi te nunga giok ale Kristus te kariimet iru ko nunga awurokko, wore ko giram ale anananga giam.

Ni den iki ale karo tuiko

19 Aga singsang yawara alo, den ewere ninguru ikialko: Den ikialko ninguru sinar talko. / Saki alo nunga den ko nedegewa ninguru ikiokko, munakaralko mu nengemang ani se, ale urtuk la nengemang me magurukko. ^{▼▼James 1:19-20 Munakanakko mu nangamang ani se: Pro 10:19. Tairate la me nangamang magurukko: Mat 5:22.} 20 MMM Mu awuk, nangamang magara ko kilek mu te, mu kiwem ningo Kaem ko kuawoso mu ana me betenakko. 21 Buta se, ikia memek nengemang te aniso se kilek memek suen la patawu saparalko. Ale ninimi ira kutuwural ale Kaem kuring bowa ningi baga se, ko den nu nengemang tuagu ningi beteram mu ninguru karo tualko. Mu awuk, den mu ninga sangaru taukko terong mam.

22 Bare den mu nedegewa la me ikialko, bare karo tualko. ^{▼▼James 1:22 Den am ipi me ikinakko: Mat 7:26; Rom 2:13.} E nina am ipi ikisan, mu nengeta ninga ikia kawel te ninimi kulursan. 23 Awiriya den ikiso bare me te beteso, mu nu kari koma motam glass te arigiso wore turan. 24 Nu koma motam arigiso ale aking namoso ale tairate koma motam aguwaya wore ko kuamili saposo. 25 Bare awiriya Kari Biya ko den yawara ana karo tunakko nangaram mu ikiso ilukuawuso, ale me ko kuamili saposo bare karo tuso, mu nu gomang amilmil te bagurukko. Mu awuk, den mu nu bataguru tauk se yawarakala bagurukko terong mam.

26 Kari awiriya nu numi ikiso Kaem ko kari maso, bare kota ko kuamili me ko sinar taso, mu nu kota numi kulurso. Noko Kaem nup patowara mu nunguning mena. 27 Bare munan Ba Kaem ko balso nup patowara nunguningkiri maso mu iwita: ana kuriang marmar se imet gerewa ikup giwasan mu nunga sangornakko. Ale nangata nanga aolak ko sinar tanakko. Ali ewere ko kilek memek mu nangamang tuagu karur tugumok bore ko ninguru sinar tanakko.